კონსტანტინოპოლი - მოსკოვის ჰარმონიული ურთიერთობის პერიოდი

---

ავტორი: პროფესორი გრიგორი ლარენძაკისი

თარგმანი: ნიკოლოზ გურგენიძე

1960 წლის 23-26 დეკემბერს რუსეთის ეკლესიის დელეგაცია, მოსკოვის პატრიარქ ალექსი პირველის ხელმძღვანელობით მსოფლიო საპატრიარქოს ეწვია. ახალი რომის ეკლესიამ დელეგაციას ოფიციალური დახვედრა მოუწყო და სპეციალური დოქსოლოგიაც აღასრულეს. პატრიარქ ალექსის მსოფლიო პატრიარქი ათინაგორა შეეგება. მანტიით და კვერთხით კი ტაძრის შესასვლელში მოსკოველ ალექსის ელოდებოდნენ, რათა კათედრაზე დამდგარიყო და მსახურებას იქიდან დასწრებოდა (მანტიით და კვერთხით), მაგრამ მოულოდნელად მისმა უნეტარესობამ უარი განაცხადა მსოფლიო საყდრის კათედრაზე ასვლაზე, რადგან თავი არ ჩათვალა მსოფლიო პატრიარქის თანაბრად და მსახურებას ტაძრის შუა ნაწილიდან დაესწრო. მისი მხრიდან ეს იყო უდიდესი პატივისცემის გამოხატულება დედა ეკლესიის მიმართ.

25 დეკემბერს აღესრულა სადღესასწაულო საპატრიარქო საშობაო მსახურება, ორი პატრიარქის მონაწილეობით. წირვის დასასრულს მოსკოვის პატრიარქმა ალექსი პირველმა მსოფლიო პატრიარქ ათინაგორას სიტყვით მიმართა:

“უფლისმიერ საყვარელო უწმინდესო მეუფეო, მიიღეთ ჩვენი სიხარულით და სიყვარულით აღსავსე მისალმება, რომელსაც გადმოგცემთ რუსეთის მართლმადიდებელი ეკლესიის სახელით, რომელიც აღავლენს ლოცვებს კონსტანტინოპოლის ეკლესიისა და თქვენი უწმინდესობის, მსოფლიო პატრიარქისათვის.

რუსეთის მართლმადიდებელ ეკლესიას არასდროს ავიწყდება, რომ დაახლოებით ათასი წლის წინ, წმინდა ვლადიმირის დროს, რუსეთის ხალხმა ბიზანტიისგან მიიღო ქრისტიანული სარწმუნოების მარგალიტი. ჩვენი ეკლესია ასევე მადლიერია კონსტანტინოპოლის ეკლესიის დედობრივი მზრუნველობის გამო, განსაკუთრებით იმის გამო, რომ ავტოკეფალია გვიბოძეთ. ეს ხუთას წელზე ადრე მოხდა და მხოლოდ ახლა მოსცა წყალობა ღმერთმა როდესაც, რუსეთის ეკლესიის პატრიარქი, ჩემი ყოვლად უღირსი პიროვნება პირადად ეწვია მსოფლიო საპატრიარქოს და აღავლენს ლოცვას მშვიდობისათვის ყოვლისა სოფლისა, კეთილად დგომისათგის წმინდათა ღმრთისა ეკლესიათა და ყოველთა ერთობისათვის.

შევთხოვთ უფალს, მის წმინდა ეკლესიას უბოძოს კურთხეული ერთობა მისი წმინდა სახელის სადიდებლად და მისი მშვიდობისა და სიყვარულის მცნების აღსრულებად”.

მსოფლიო პატრიარქმა ათინაგორამ კი პასუხად მიუგო: “გულითადად გეგებებით ამ წმინდა ადგილას და მოგმართავთ, როგორც ქრისტეს დიდი ეკლესიის (მსოფლიო საპატრიარქოს) შვილი რუსეთის უწმინდესი მართლმადიდებელი ეკლესიის ღირს მწყემსმთავარს...”.

ამონარიდი სტატიიდან “უკრაინის ავტოკეფალის” - https://www.orthodoxianewsagency.gr/epikairotita/o-kathigitis-grigorios-larentzakis-gia-to-oukraniko-aytokefalo/